Jos 7 | NdeIBE | STEP | Kodwa abako-Israyeli bephula umthetho phezu kokugcinwa kwezimpahla ezahlukaniselwa kuJehova; u-Akhani indodana kaKhami indodana kaZimiri, indodana kaZera, owesizwana sakoJuda, wathatha ezinye zakhona. Ngakho ulaka lukaJehova lwavutha kwabako-Israyeli.

Joshua 7

Isono sika-Akhani

1 Kodwa abako-Israyeli bephula umthetho phezu kokugcinwa kwezimpahla ezahlukaniselwa kuJehova; u-Akhani indodana kaKhami indodana kaZimiri, indodana kaZera, owesizwana sakoJuda, wathatha ezinye zakhona. Ngakho ulaka lukaJehova lwavutha kwabako-Israyeli.

2 Ngakho uJoshuwa wathumela amadoda esuka eJerikho esiya e-Ayi eseduzane leBhethi Aveni ngempumalanga yeBhetheli wathi kubo: “Hambani liyehlola lelolizwe.” Yikho amadoda aphuma ayahlola ilizwe.

3 Bathi bephindela kuJoshuwa bafika bathi, “Kayisuye wonke umuntu okumele ayelwisa i-Ayi. Thumela amadoda azinkulungwane ezimbili kumbe ezintathu ukuze ayoyithumba njalo ungaze wadinisa abantu bonke, ngenxa yokuthi lelodolobho lilabantu abalutshwana.”

4 Amadoda abalelwa kunkulungwane ezintathu asuka ahamba kodwa ehlulwa ngamadoda e-Ayi, wona 5 abulala amadoda angamatshumi amathathu lesithupha. Baxotsha abako-Israyeli besuka esangweni ledolobho baze baya batshiya enkwalini bababulalela ekwehleni. Bathi besizwa lokhu abantu baba lokwesaba okukhulu baphelelwa ngamandla.

6 UJoshuwa wadabula izigqoko zakhe wathi mbo phansi ngobuso phambi kwebhokisi lesivumelwano sikaJehova, wala elokhu enjalo kwaze kwahlwa. Abakhokheli bako-Israyeli labo benza njalo, basebezithela ngothuli emakhanda abo.

7 UJoshuwa wasesithi, “Maye, Jehova Wobukhosi, wabachaphiselani iJodani lababantu ukuzabanikela ezandleni zama-Amori ukuze asibhubhise? Ngabe sasuthiseka ngokuzihlalela kwelinye iphetsheya leJodani!

8 Maye, Jehova kuyini engingakutsho, njengoba u-Israyeli esebhuqwe yizitha zakhe?

9 AmaKhenani labanye abantu belizwe bazakuzwa ngalokhu besebesihanqa besule igama lethu emhlabeni. Pho kuyini ozakwenzela igama lakho elikhulu kangaka na?”

10 UJehova wathi kuJoshuwa, “Sukuma. Kuyini okwenzayo uthe mbo ngobuso bakho?

11 Abako-Israyeli bonile; bephule isivumelwano sami, engabalaya ukuthi basigcine. Sebethethe ezinye izinto ezahlukaniselwe mina bantshontsha, baqamba amanga, sebezifake empahleni yabo. 12 Yikho abako-Israyeli bebengeke bamelana lezitha zabo; bayafulathela besebebaleka ngoba sebeyinto efanele ukubhujiswa. Kangisoze ngibe lani ngaphandle kokuthi lichithe lokho okwakwehlukaniselwe ukubhujiswa.

13 “Hamba ungcwelise abantu. Ubatshele uthi, ‘Zingcweliseni ukulungiselela kusasa; ngoba lokhu yikho okutshiwo nguJehova uNkulunkulu wako-Israyeli ukuthi: Lokho okwahlukaniselwe uJehova kuphakathi kwenu, lina bako-Israyeli. Kalingeke limelane lezitha zenu ngaphandle kokuba selikukhuphile.

14 “Ekuseni kumele lisondeze isizwana ngesizwana. Isizwana esikhethwa nguJehova kuzamele sisondele phambili usendo ngosendo; usendo oluzakhethwa nguJehova luzasondela imuli ngemuli; imuli ezakhethwa nguJehova izasondela umuntu ngamunye. 15 Lowo ozafunyanwa elezinto ezahlukaniselwe uJehova uzatshiswa ngomlilo, lakho konke alakho. Wephule isivumelwano sikaJehova njalo wenze into elihlazo phakathi kuka-Israyeli.”

16 Kusesele ngelanga elilandelayo uJoshuwa wenza u-Israyeli wasondela ngezizwana, inkatho yadla koJuda. 17 Izinsendo zakoJuda zasondela, inkatho yadla abakoZera. Wasondeza izinsendo zakoZera ngezimuli. Inkatho yadla uZimiri. 18 UJoshuwa wasondeza imuli kaZamiri indoda yinye ngayinye, inkatho yadla u-Akhani indodana kaKhami, indodana kaZimiri, indodana kaZera owesizwana sakoJuda.

19 UJoshuwa wathi ku-Akhani, “Ndodana yami, dumisa uJehova, uNkulunkulu ka-Israyeli, umuphe udumo. Ngitshela lokho okwenzileyo, ungaze wangifihlela.”

20 U-Akhani waphendula wathi, “Liqiniso! Ngonile phambi kukaJehova, uNkulunkulu wako-Israyeli. Nanku engikwenzileyo: 21 Ngathi ngibona phakathi kwempango ingubo enhle yase Bhabhiloni, lamashekele esiliva angamakhulu amabili lomgqala wegolide olesisindo samashekeli angamatshumi amahlanu ngakuhawukela, ngakuthatha. Ngakwembela phansi ethenteni lami, isiliva singaphansi.”

22 UJoshuwa wathuma izithunywa, zagijima zaya ethenteni lakhe, zakufumana kufihlilwe ethenteni lakhe, isiliva singaphansi. 23 Bathatha izinto ezazisethenteni, baziletha kuJoshuwa lebantwini bonke bako-Israyeli, bazichaya phambi kukaJehova.

24 UJoshuwa labo bonke abako-Israyeli bathatha u-Akhani indodana kaZera lesiliva, ingubo, lomgqala wegolide, lamadodana lamadodakazi akhe, lezinkomo zakhe, obabhemi kanye lezimvu, ithente lakhe lakho konke ayelakho bakusa esiHotsheni se-Akhori.

25 UJoshuwa wathi, “Kungani usilethele uhlupho olungaka? UJehova uzakwehlisela uhlupho lamhlanje.” Bonke abako-Israyeli bamtshaya ngamatshe, njalo bathi sebeqedile ukutshaya labanye ngamatshe babatshisa. 26 Babuthelela inqwaba yamatshe amakhulu phezu kuka-Akhani alokhu ekhona lalamhlanje. Ukuvutha kolaka lukaJehova kwahle kwaphela. Ngakho leyondawo lalamhlanje ilokhu isabizwa ngokuthi yisiGodi sika-Akhori.